За родители
Hustle е отворен за ученици и студенти од 14 години. Еве што значи тоа за Вашето дете: што прегледува тимот, што се гледа на профилот и како да ни пишете.
Hustle е во бета-верзија. Деловите со ознака Планирано доаѓаат со плаќањето, по бета-верзијата. Сè друго на оваа страница важи сега.
Регистрација од 14 години
На Hustle може да се регистрира секој што има најмалку 14 години. Според Законот за заштита на личните податоци, тоа е возраста за дигитална согласност, па за регистрација не е потребна согласност од родител или старател.
Датум на раѓање при регистрацијата
Регистрацијата го бара датумот на раѓање и не пропушта никого под 14 години.
Истиот Hustle, построги правила
Ученик под 18 години го користи Hustle како и сите други, но неговите услуги и потреби прво ги гледа тимот, како што пишува подолу.
Родител подоцна, за исплатата (планирано)
Кога ќе стигне плаќањето, родител или старател ќе биде потребен само ако ученикот нема своја банкарска сметка.
Што прегледува тимот
Услугите и потребите од корисници под 18 години не стануваат јавни веднаш: прво ги прегледува тимот на Hustle.
Услугите и потребите чекаат преглед
Услуга или потреба од корисник под 18 години не е јавна додека тимот не ја одобри. Услугата се прегледува повторно по секоја промена на текстот или сликите.
Филтер за клучни зборови
Ги проверува профилите, огласите, пријавите, пораките, нарачките и рецензиите. Бара телефонски броеви и други контакти за договор надвор од Hustle, навреди, сексуална содржина, дрога, оружје, самоповредување и коцкање. Тоа што ќе го најде останува скриено додека тимот не го прегледа, а задржаната порака не стигнува до другата страна.
Пријавите на потреби
Пријавата што ученикот ја праќа на потреба на некој бизнис не чека преглед, но и неа ја проверува филтерот. Ја гледаат само ученикот, бизнисот и тимот.
Профилот на ученик под 18 години
Профилот на ученик или студент станува јавен кога е целосен: име, барем една категорија, биографија и град. Дотогаш го гледаат само ученикот и тимот на Hustle.
Целото име, без училиште до 18 години
Јавниот профил го покажува целото име внесено при регистрацијата. Училиштето не се прикажува додека ученикот не наполни 18 години, а датумот на раѓање и е-адресата никогаш.
Фотографијата не е задолжителна
Секој сам одлучува дали ќе додаде фотографија. Фотографиите и сликите се намалуваат пред да се прикачат, па од нив се бришат податоците за локацијата и за телефонот. Датотеките на сертификатите се прикачуваат непроменети и се јавни на профилот.
Јавно, и во пребарувачите
Сè друго на профилот е јавно. Профилите на корисниците под 18 години се појавуваат и во пребарувачите како Google, исто како профилите на сите други.
Безбедност во разговорите
Договорот за работата се води во пораките на Hustle, па за секој разговор и секоја нарачка останува запис.
Кој може да пише
Секој со сметка на Hustle, бизнис или ученик, може да пише на секој што има јавен профил, па и на ученик под 18 години. Кој прв пишува, праќа барање: најмногу 3 пораки, само текст, додека другата страна не го прифати.
Блокирање и пријава
Секој може да блокира кого сака: блокираниот повеќе не може да пишува во тој разговор ниту да започне нов. Пораките и профилите може да се пријават на тимот.
Разговор со „Hustle тим“
Секој корисник има закачен разговор со тимот на Hustle. Таму Вашето дете може да побара помош или да каже ако нешто не е во ред.
Тимот може да ги чита разговорите
Разговорите не се скриени од тимот: тимот може да ги чита и да скрие порака што ги крши правилата. Секое читање на туѓ разговор се запишува.
Плаќање и исплата
Во бета-верзијата преку Hustle не се движат пари: нема плаќање, исплата ни провизија. Ако бизнисот и ученикот се договорат за плаќање меѓу себе, тоа е меѓу нив двајца, и Hustle не учествува во него.
Заштитено плаќање (планирано)
Кога ќе стигне плаќањето, бизнисот ќе ја плаќа цената однапред, а Hustle ќе ги чува парите додека не ја одобри работата.
Исплата на сметка на родител или старател (планирано)
Ако ученикот под 18 години нема своја банкарска сметка, парите ќе се уплаќаат на сметката на родител или старател.
Hustle ќе задржува 10% од цената. Од нарачка од 2.500 ден., фриленсерот ќе добие 2.250 ден., а 250 ден. ќе бидат провизија.
Бришење на сметката и контакт
Сметката може да се избрише во секое време, во поставките на профилот. Бришењето е веднаш и целосно: сметката, профилот, проектите, сертификатите и сите датотеки. Ништо не може да се врати.
Целосните правила се во условите за користење, а што важи за податоците на учениците под 18 години, во политиката за приватност:
За сè друго пишете ни. Тимот на Hustle директно одговара на прашањата од родителите.